Мақалалар мен сұхбаттар

25.04.2017

Ұлттық кітапханадағы құндылықтар

Ұлттық кітапханадағы құндылықтар

"Егемен Қазақстан" газеті. 2017 жылғы 24 сәуір

Ұлтты да, жұртты да, қыл аяғы адамды да танытатын тегі мен тарихы. Арғы-бергі заманның райы мен шырайын да сол тарихтағы таңба көрсетіп береді. Таңбаңыз сөзбен сабақталып, кейін қағаз бетіне түседі. Алдымен ол тасқа қашалған, келе-келе кітапқа айналған. Сөйтіп, кітапхана әлемі салтанат құрған. Ондай кітапхана қазақ топырағында да болған. Отырар кітапханасын айтамыз. Қара табан қазақта түк болмаған деп түкірігі шашырағандар енді тілін тістеп отыр. Бұл – бұрынғы сарын. Қазіргі қарым бөлек. Мақала желісіне көшкенде, еңсесі биік елордамыздағы ұлт руханиятының кеніші, аз уақытта көп тірліктің ұйыған орталығына айналған Ұлттық академиялық кітапхананың еңселі ғимараты мен ішіндегі алтынға айырбастамайтын қыруар қазына, әр күн сайын өтіп жататын іс-шаралар тізбегі көз алдыңа келеді.

Осыдан он үш жыл бұрын Үкімет қау­лысымен кітапхананың іргетасы қа­ланып, Елбасы Нұрсұлтан Назарбаев ашылу рәсіміне қатысып, ақ тілегін біл­дірген болатын. Дәуір жаңарып, заманның өзгеріп, техника мен технологияның жетілуін желеу еткен кейбір азаматтар кітапханаға күмәнмен қарайтыны белгілі. Ақиқатына келсек, сол техника мен тех­нологияңыз кітаптай өміршең бола қоюы екіталай секілді. Бір құбылыста оның өнімі жойылып кетуі де ғажап емес-ау! Бұған қоса, ол адам денсаулығына зиянсыз дей алмасақ керек. Ал кітаптан алар тағылым мен қуат, өнеге мен үлгі бөлек. Тарихтан дәйек жетіп артылады. Бір кездері бәрін техникаға теліген кейбір елдер, оның ішінде Ұлыбритания халқы кітапқа қайта ден қойыпты. Іргелес жатқан көршімізден жеткізіліп, Отанымыздағы кітап дүкендерінде самсап тұрған, безендірілуі таңдай қақтыратын дүйім дүниелер – кітаптың өміршеңдігін көрсеткендей. Содан да шығар, «Кітап атау­лы досы бола бастаған шақтан былай ғана әрбір жан өзін интеллигент бола бастадым деп санауына болады» (М.Әуезов), «Кітап маған тақтан да қымбат» (У.Шекспир), «Кітаптан басқаның бәрі дәрменсіз» (А.Чехов) деген сөздерді ұлылар мұраға бекер қалдырмаған-ау!

 

Қомақты рухани қор

Азат Қазақ елінің Ұлттық академиялық кітапханасы бүгінгі серпілісімен дами берсе, халқымыздың рухани құндылықтары жинақталған қазынаның түп қазығы болары ақиқат. Әлем тарихына көз жіберсек, біздің Ұлттық кітапхана секілді құндылықтар жиналған орындар да бірден емес, бірте-бірте қалыптасқан. Мысалы, б.з.д. ІІІ ғасырдың басында шаңырақ көтер­ген Александрия кітапханасын айт­пағанда, 1368 жылы іргетасы қалан­ған, қоры жағынан әлемдегі бай кітап­ха­налардың бірі саналатын Франция ұлт­тық кітапханасы, 1753 жылы құрылған Бри­­тания кітапханасы – қай-қайсысы да көп­теген жылдарды артқа тастай отырып, төрт құбыласын түгендеген. Біздің Ұлт­тық академиялық кітапханаға да өз мем­лекетіміздегі, әлемнің бар асылдары күн өткен сайын жинақталу үстінде. Ол асыл­дың негізгісі – кітап. Әр алуан тілде жарық көрген жәдігерлерге көз жіберсең, кере­мет шабыт береді. Небір тағдырларға кездесесің.

Біз Ұлттық академиялық кітап­хана­ның басшысы, педагогика ғылымдарының докторы, профессор, Қазақстанның еңбек сіңірген қайраткері Үмітхан Мұңалбаеваны әңгімеге тартқанымызда ол: «Кітап – көкірегінің көзі ашық адам баласының ғасырлар бойы жинақтаған тамшыдай мөлдір ойлары мен көзқарастарының көркем көшірмесі. Уақыт желісінде тозаң тартқан тарихымыз бен болашағымызды байыптап таразылау үшін тасқа қашалған жазбаларымыз бен жүздеген жылдардың те­зінен өткен кітаптарымыз – біздің ең қасиетті, ең құнды мұрамыз. Міне, осын­дай баға жетпес жәдігерлеріміздің асыл төрі – кітапхана, – деп ойын одан әрі жал­ғады. – Бұл құнарлы орда кітап пен ұлт руханиятына ден қойған адамдардың бар­шасы үшін есігі ашық қазіргі заманғы ақпа­раттық мекеме. Оқырмандар билігінде ақпа­раттық және сервистік қызметтің толық жиынтығы бар: электронды каталог, ин­тернет пен қашықтықтағы деректер базасына қолжетімділік, виртуальды анық­тамалық қызмет, құжаттарды элек­трон­ды жеткізу, газет-журналдар, мульти­ме­диялық басылымдар молынан. Оқу залдары бір мезгілде 500-ден астам оқырманды қабылдайды. Ал «Мәжіліс», «Сұхбат» және «Конституция» залдарында дәрістер, конференциялар, тұсаукесерлер, көрмелер және кездесулер өткізу үшін толық жағдай жасалынған. Кітапхананың (www.nabrk.kz) корпоративтік сайты бар. Сонымен қатар, кітапхана «Қазақстандық ұлттық электрондық кітапхана – Элек­трон­ды мемлекеттік кітапханалық қор» жобасын жүзеге асырудың базасы болып табылады (www.kazneb.kz.). Бұ­ған қоса, біздің мекеме Қазақ елі Кітап­ханалар, Еуразия Кітапханалар ассо­циа­ция­сы, IFLA Кітапханалық ассоциациялар­ мен мекемелердің Халықаралық федерация­сының мүшесі болып табылады. Кітап­ха­нада 20 оқырман залы бар. Оның ішін­де «Мырзатай Жолдасбековтың ме­мо­­риалдық кітап коллекциясы» залы, Дүкен­бай Досжан атындағы «Жазушы», Тұр­­сынбек Кәкішев атындағы «Ғалым», «Құн­ды тарту», «Абай», Әмбебап оқырман зал­дары жұмыс істейді. Жалпы, кітапхана қоры 1 455 201 кітапты құрайды. Оның 589 788-і қоғамдық-саяси әдебиеттер, 182 861-і денсаулық сақтау, медицина, жаратылыстану ғылымдарына, 165 630-ы тех­ника, ауыл және ауыл шаруашылығына, ал 115 325 өнер, дене шынықтыру және спорт­ салаларына, 401 597 филология мен көр­кем әдебиетке тиесілі. Осы бай қа­зы­наның мемлекеттік тілдегісі – 538 360, орыс тіліндегісі – 753 699, басқа тілдер­де­гісі 136 138 екенін айта кетсем деймін».

 

Бүгінгі оқырман сұранысы қандай?

Алда еске салғанымыздай, бүгінгі оқырманның санасын смартфон жайлап алған, жастар арасында кітап оқылмайды деген үйреншікті қағида қалыптасып отыр. Дегенмен, Ұлттық академиялық кітапханаға келетін оқырмандардың қарасы жылдан жылға артуда екен. Оған дәлел, биылғы статистика бойынша қашық­тықтан байланыс жасайтын оқыр­ман­дарды санамағанда кітапханаға тіркел­ген­дердің өзі былтырғыға қарағанда 72%-ға артыпты. Оқырмандар талабын ескеріп, электронды кітапхана еке­ніне қарамастан үйге кітап алу үшін 2010 жылы абонемент залы ашылыпты. Осы залға күніне орта есеппен 50-60 оқырман келіп, қалаған кітабына қол жеткізуге құқылы. Сол залға келетіндердің жасы 15 пен 60 аралығында көрінеді. Үмітхан Дәуренбекқызының айтуынша, Тәуелсіздігіміздің 25 жылдығына орай, кітапхана оқырмандары арасында «25 кітап оқы» атты оқу марафон жарияланыпты. Ол байқауды өткен жылдың наурызында бастап, желтоқсанда қорытындылағанда оқырмандардың көптігі байқалған. Мәселен, жеке кәсіпкер С.Досыбаев – 77, банк қызметкері Г.Сүлейманова – 64, студент Ә.Райынбеков 44 кітап оқып, жеңімпаздар қатарынан табылыпты. Бұлар сияқты кітап десе, ішкен асын жер­ге қоятын зиялы жандар ондап емес, мыңдап саналады. Ал оқырмандардың талғамы жағына келсек, фантастикалық, классикалық және психологиялық бағыт­тағы кітаптарға сұраныс артқан. Қазақ әдебиетінен Абай, Алаш алыптары Ә.Бөкей­ханов, М.Дулатов, Ж.Аймауытов, А.Байтұрсынов және М.Әуезов, І.Есен­берлин, Ә.Нұрпейісов, М.Мақатаев, М.Ша­ханов, бұған қоса, шетел әдебиетінен Д.Грин, А.Чехов, К.Дойл, Э.Хемингуэй, тағы басқалардың шығармалары әрдайым жұрт қолында жүретінін білдік.

Оқырмандардың 36,7 пайызы 15-21 жас аралығындағы білім алуға ұмтылған жастар екен. Осы арада мына бір нәрсені айта кетсек дейміз. Әр азамат жасына немесе тұрғылықты жеріне қарамастан кітапхананың тұтынушысы бола алады. Кітапхананың қызметін пайдалану үшін тіркеу бөлімінен оқырман билетін алу қажет. Ол үшін қандай да бір жеке басын куәландыратын құжатты көрсетуі керек. К­ітапханаға жазылу автоматтандырылған тәр­тіпте жүзеге асырылады. Сонымен қатар, теңд­ессіз штрихкодымен бірыңғай плас­ти­к­алық билет беріледі. Көркем әдебиетті уақытша пайдалану үшін үйге алғыңыз келсе, міндетті түрде Астана қаласында тұрғылықты жері бойынша тіркелімі болуы тиіс. Ал қалған қызметтер барлық оқыр­мандарға қол жетімді. Сондай-ақ, кітап­хана пайдаланушыларға қашықтық тәртібінде қызмет көрсетуге де мүмкіндік беріледі. Бұл үшін nabrk.kz: электрондық порталға өтінім жасап, тілек білдіруші аты-жөнін, туған жылын, білімін, оқу немесе жұмыс орнын, тұрғылықты мекен-жайын, егер мүмкіндігі болса, 3х4 фотосуретін е-көшірмесі және электронды поштасын жолдаса болғаны. Сол кезде қазақстандық Ұлттық электрондық кітап­ха­насы порталының қызметкерлері қажетті еңбекті қашықтықтан өтінім берушінің электрондық поштасына жіберіп отырады.

 

Сирек кітаптар мен қолжазбалар

 

Ғылым, сирек кітаптар мен манус­крип­тер қызметі – бұл құнды басылымдар жиынтығынан тұратын кітапхана қорының ерекше бөлігі. Негізгі мақсаты, еліміздің мәдени және ғылыми мұрасын сақтау және насихаттау. Қызметтің үйлестіретін іс-шаралары – қолжазба материалдарын анықтау және зерттеу бойынша ғылыми жұмыстарды атқару болып табылады. Сондай-ақ, қорда оқырмандар залы да бар.

Қазіргі таңда кітапхана қорында VI-XX ғасырлар аралығында жарық көр­ген 20 мыңға жуық сирек кітаптар мен қолжаз­балар жинақталған. Ондай басылым­дар қатарында: медицина, экономика, сая­сат, әдебиет, тағы басқа салалар бар. Қазақ, орыс, неміс, араб,шағатай,орта тү­рік тілінде, француз, тағы басқа шет тіл­деріндегі сирек кітаптар мен қол­жаз­балар бірегей миниатюра-кітаптар, бі­ре­гей түптелген сирек кітаптар, атластар, с­у­ретшілер альбомдары аз емес. Құран топ­тамалары, араб, латын, шағатай, түрік таңбаларымен, кириллицамен жазыл­ған қазақ тіліндегі кітаптар мен қолжаз­балар, Ахмет Байтұрсыновтың 1909 жылы ж­а­рық көрген «40 мысал» кітабы мен 1926 жыл­ғы суретті «Әліпбиі», ұлы Мұхтар Әуезовтің «Абай» романының 1942 және 1945 жылдары жарық көрген нұсқалары сақталған. Айрықша құнды кітаптар мен қолжазбалар қатарында Құран Кәрімді атау­ға болады. Қолжазба 799 жылы қа­ғаз­ға түсіріле бастаған екен. Сондай-ақ бам­бук тақтайшаға жазылған ежелгі қытай қолжазбасы да дерегі мол жәдігер. Кітапты бел­гілі фламанд суретші Сэр Энтони ванн Дейк безендіріпті. Бұл дүние жүзіндегі жал­ғыз кітап, Ұлттық академиялық кітап­х­а­насының сирек және қолжазбалар қорында кіршіксіз қалпында сақтаулы тұр. Жібек қол­жазбадағы «Конфуций афоризмдері», қазақ диаспорасының белді өкілі Хасен Орал­тайдың 6441 құжаттан тұратын мұра­ғаты, академик Зәки Ахметовтің 876 құжа­ттан құралған мұрағаты да сақтаулы тұр. Айта берсек, құнды жәдігерлерге кенде емес екенбіз.

Латын графикасымен басылған қазақ кітаптары топтамасында қазақтың классик жазушылары Сәкен Сейфуллин, Бейімбет Майлин, Ілияс Жансүгіров, Сәбит Мұқанов, Жамбыл Жабаев, Ғабит Мүсірепов, Тайыр Жароков, т.б. туындылары атап өтуге тұ­рар­лық. Бұл кітаптар мен қолжазбалар өз зерт­теушісін күтіп жатқаны да анық. Егер зерттеп, зердеден өткізсек ұлт тарихына олжа салар тың деректер айналымға түсері сөзсіз. Зерттеушілердің назарына іліп, құпиясына үңілу жайын ұйымдастырсақ ұтылмас едік. Мұндай ауқымды жұмыстың алда атқарылатынына сеніміміз мол. Кейбір кітаптар өзінің зерттеушілерін тауыпты.

 

Кітап мұражайы

 

Ұлттық академиялық кітапхананың он жылдық мерейтойына орай, Кітап мұражайы оқырмандар үшін есік аш­қан еді. Бұл жұртшылыққа, елордаға ат ба­сын тіреген меймандарға, яғни ұл­ты­­мыздың рухани және материалдық мәдениетінің феномені ретінде қызмет ете­ді. Жи­нақ­тал­ған кітап және өзге де қа­зы­на­мыз­бен терең танысуына мүмкіндік алады.

Мұражайда сирек кітап пен қол­жаз­балар, академик Зәки Ахметовтің кі­тап коллекциясы орналасқан. Оны ғалым­ның зайыбы Зия Ахметова сыйға тар­тқан екен. Бұл елеулі еңбектер Ал­ма­ты­дағы Кітап музейінен, Ұлттық кі­тап­­ханадан және Астанадағы Ұлттық ака­демиялық кітапхана қорынан алынған жә­дігерлер. Осы жәдігерлерді 25 722-ге жуық елордалық тұрғындар мен шет­елдік қонақтар келіп тамашалаған. Кітап­ха­на музейіндегі сирек кітаптар мен қолжазбаларды ұстап көруге рұқсат етілмейді. Дегенмен, келешекте оқырман қауымның құнды деректерге дер кезінде қол жеткізуі, әрі келер ұрпаққа аманаттау үшін кітап­ханада сирек кітаптарды цифрлау ар­қы­лы пайдаланушының сұраныстарын қа­нағаттандыруға және сирек кітаптар қорларын дәстүрлі, электронды нұсқаларда сақтауға мүмкіндік бар болып шықты.

«Музей құрудағы мақсат – қазақ тарихына, мәдениеті мен ғылымына қатысты көне қолжазбаларды, сирек басылымдар мен аса құнды мағлұматтарды қорға жинап сақтау, зерттеулер жүргізу, әрі көпшілікке насихаттау. Бұл жұмыс әлемдік стандарттарға сай келеді. Кітап музейі – отандық кітап тарихын өз халқымызға да, өзге ел азаматтарына да жеткізуге бағытталған», – дей келіп, кітапхана басшысы: үш бөлімнен тұратын, яғни бірінші бөлім – жазу тарихына, нақтылай түссек, Түркі өркениеті Күлтегін жазуларынан, екінші бөлім – Ислам өркениетінің айтулы өкілдері әл-Фараби, Қ.А.Ясауи, Ж.Баласағұн, М.Х.Дулати еңбектерінен, үшінші бөлім – Құран және Ислам туралы кітаптар топтамаларынан, төртінші бөлім – Қазақ елінде және шетелдерде жарық көрген кітаптардан, бесінші бөлім – Ұлттық академиялық кітапхана қорындағы сирек кітаптар мен қолжазбалардан тұратынан еске салды. Сонымен қатар, кітапханада атқарылып жатқан игі шараларға да жан-жақты тоқталып, төрткүл дүние назар аударып отырған ЭКСПО-2017 кезіндегі көрсетілетін қызметке баса көңіл бөліп, біраз жылдан бері жүйелі жолға қойылған «Бір ел – бір кітап» бойынша осы жылы «Жыл кітабы» ретінде мына өмірден ерте кеткен талант иесі Сұлтанмахмұт То­рай­ғыров шығармалары оқытылатынын ал­ға тартты. Кітапхананың редакциялық-бас­па жұмыстары бойынша шығарылып жат­қан көрсеткіштерге, рухани орталық­тың тірлік-тынысын жұртқа жеткізетін ар­найы жа­рық көріп отырған журнал, онда бас­ыл­ған материалдар туралы да молынан мә­лімет берді.

 

«Құнды тарту» залы және «Жолдасбековтің кітап коллекциясы»

 

«Құнды тарту» залы 2015 жылдың қарашасында ашылыпты. Бұл «Құнды тарту» акциясы аясында жүзеге асып, кітапхана қорын молайтуға қосқан үлестің нәтижесінде жасақталыпты. Әлемдік тарих пен философияны, экономика мен саясатты, тіл білімі мен әдебиетті, түркітану және өнертану туралы сирек басылымдар қатарындағы эксклюзивті кітаптар ерекше назар аударады. Тіпті, ХVІІ-ХVІІІ ғасырлардағы құндылықтар да аз емес. Кейбір кітаптардың безендірілуі бойынша сирек репринтті, аз таралымды полиграфиялық жағынан орындалуы керемет екеніне көз жеткізесің. Кітап түптеу өнерінің де ерекше болғанын аңғарасың. Әсіресе, каталогтағы сирек кітаптар 799 жылдан бастап бір әулеттің үрімбұтағының бастамасымен қағаз бетіне дәстүрлі түрде түсіріліп келген «Құран тәпсірлері», яғни ежелгі Құран тү­сініктемесі; Джон Рашуоттың тарихи топ­тамасынан 1686 жылы жарияланған 10 шежіренің бірі; 1735 жылы Парижде ба­сылған Қытай, Иран, Үндістан және Жа­пония түпнұсқа түрлерінде жинақталған Қытай суреттері де тартымды. Сол секілді «Живописное путешествие по Азии» бірегей басылым; Брокгауз бен Ефроның (1890-1901) энциклопедиялық сөздігі, оның 82 томы мен 4 қосымшасы ерекше есте қалады. Төрт керегеде тіреліп тұрған кі­тап­тар мен қолжазбаларға үңілсең адамзат өткен қилы кезеңдерді, соны тасқа басып артына қалдырған сардар саңлақтарды танып білесің. Бұл неткен жанкешті еңбек демеске шараң жоқ.

«Құнды тарту» залының барлық қоры 5511 атаудан тұрса, онда 5927 жәдігер орын алған. 5619 кітаптың – 300-і қазақ, 4513-і – орыс, 1114-і шет тілдерінде екен. Мұның бәрі ұлт құндылығына қосылған мұра деп білеміз.

Ал көрнекті мемлекет және қоғам қайраткері, қазақ ғылымында өзіндік орны бар оқымысты Мырзатай Жолдас­бе­ковтің залындағы дүниелер бүгінгі ұр­пақ оқып ойланатын, келер ұрпақ ұлт жақсыларымен дидарластыратын құн­ды­лық екені сөзсіз. 415 мемориалдық экс­по­наттардың қатарында тағылым алар кәдесыйлар, портреттер, дипломдар, сертификаттар, монеталар болса, 908 аудио, бейнематериалдар, күйтабақтар мен көне бұйымдар ерекше есте қалады. 609 мерзімдік басылымды қосқанда 9426 (8162 аталым) кітап, өзге де заттар кітапхана қорына қосылыпты. Біз ардақты азаматтың осы еңбектерін бір­неше күн бойы қарап шыққанда, әлем өр­ке­ниетінде өзіндік орны бар алуан түрлі дү­ниелерімен қауышқандай болдық. Әсі­ресе, Түркі дүниесіне, Қытай тарихына, мұсылман, араб әлеміне қатысты небір сирек кітаптар өз зерттеушісін күтіп жат­қаны анық. Ұлтымыздың бай қазынасы саналатын 100 томдық «Бабалар сөзі», 100 томдық шетел әдебиеті классиктерінің туындылары, энциклопедиялар, С.Соло­вь­ев­тің 15 кітаптан тұратын 29 то­мы, қазақ әдебиетінің, ғылымының ай­тул­ы өкілдерінің шығармалары – қай-қай­сы­сына үңілсең, алыптардан бастап бүгінгі жас таланттарға дейінгі шоғыр-шоғыр ұрпақпен табысасың.

Әсіресе, қолтаңбалар бөліміндегі кітаптарды қарап отырсаң, ұлылардың ізетті сөзіне, кішілігі мен кісілігіне бас иесің. Мысалы, 1955 жылы жарық көрген 6 томдығының 3-ші томына ұлт жазушысы Мұхтар Әуезов: «Інішек Мырзатайға!» деп екі сөзбен ілтипат танытып, қолын қойса, тағы бір ардақтымыз Әбділда Тәжібаев: «Өзімнің өзегімнен шыққандай Мырзатайыма! – ағаң Әбділда» деп жазыпты. Сол секілді драматург Шахмат Хұсайнов (өз жазуы) 1961 жылғы кітабына «Ерік өзіңде, тек жүрегіңіз білсін. Оқып шық. Сына, пікір айт, ағаңыз» десе, академик Зейнолла Қабдолов «Ақылды, ойлы, білімді, мәдениетті Мырзатайдың маған ең қымбат қасиеті – әдебиетшілдігі. Ол нағыз қаламгер. Сөз өнерінің өз адамы», деп жазғаны да ғалымға берген ақиқат баға екені анық. Тағы бір қолтаңбаны 1964 жылы Мырзағаң өзі қалдырған екен. Оқып көрелік. «Мәрияш! 8-март – Халықаралық әйелдер күні мерекесімен құттықтай отырып, өміріңнің ұзақ, еңбегіңнің өнімді, әркез баллар (өз жазуы) дені сау болуын тілеймін», дейді. Бұдан аңғарарымыз, егер ол тұста гүл сыйласа, мынадай тағылымды сөз кейінгі ұрпаққа қалар ма еді? Кітаптың құндылығы деген осы болса керек.

Жалпы, ұлттық кітапхана – ұлт бай­лығы. Осы арада мына бір байламды да ортаға сала кетсек дейміз. Алдағы уақыт­та біраз ұлт жақсыларының кітап­та­ры Ұлттық кітапханадан орын ала­ды екен. Солардың қатарында қазірдің өзін­де академик Кеңес Нұрпейістің жиған еңбектері Алматыдан жеткізіліпті. Шы­нында, осы секілді қазақ­тың қаламгер­лері мен ғалымдарының бай мұрасына жа­нашырлық таныта алсақ, бар­шылық. Кейбір жеке тұлғалардың кітап­ханалары өңірлерге «жол тартып» жатыр. Соның қатарында қазақ өлеңін ақылмен ұштас­тырып, философиялық иірімдермен ас­тас­тырған Қадыр Мыр­за­лиев­тің бай кі­тапханасы Жайықтың жағасына, Орал қаласына орын тепті. Бұл да керек шығар. Дегенмен, азат елдің рухани байлығы саналатын мұндай құндылықтарды бір ор­талыққа жинастырып, келісті ғи­ма­ратқа орналастыра алсақ, береке-бір­лік­ке ұйытқы, зерттеп, зерделеуге де оңай болары хақ. Кітапханалардағы мұраның үстіне қоса беру – бір кездері көбейіп кетіп, елеусіздікке ұрынбай ма, ғимарат тарлық етпей ме деген ой мазалайды. Мұны келешекте жұрт болып жұмылып шешіп жатсақ, нұр үстіне нұр болады. Ал әңгіменің негізгі желісін құраған Ұлттық кітапханадағы құндылықтардың қазіргі сақталуы мен атқарылып жатқан жұмыстары ел көңілінен шығып отыр. Біз оның кейбір тұстарын ғана атап өттік. Келешекте әр сала бойынша таныстырып отырсақ, тағылымды іс болары сөзсіз.

 

Сүлеймен МӘМЕТ,

«Егемен Қазақстан»

Өзгерту: 16.05.2017